प्रथमं ब्राह्मणम्

ओं । उषा वा अश्वस्य मेध्यस्य शिरः । सूर्यश्चक्षुर्वातः प्राणो
व्यात्तमग्निर्वैश्वानरः संवत्सर आत्माश्वस्य
मेध्यस्य । द्यौः पृष्ठमन्तरिक्षमुदरं पृथिवी पाजस्यं दिशः
पार्श्वे अवान्तरदिशः पर्शव ऋतवोऽङ्गानि मासाश्चार्धमासाश्च
पर्वाण्यहोरात्राणि प्रतिष्ठा नक्षत्राण्यस्थीनि नभो
मांसानि । ऊवध्यं सिकताः सिन्धवो गुदा यकृच्च क्लोमानश्च पर्वता ओषधयश्च
वनस्पतयश्च लोमान्युद्यन्पूर्वार्धो निम्लोचञ्जघनार्धो यद्विजृम्भते
तद्विद्योतते यद्विधूनुते तत्स्तनयति यन्मेहति तद्वर्षति वागेवास्य वाक्
॥ १ ॥

oṃ | uṣā vā aśvasya medhyasya śiraḥ | sūryaścakṣurvātaḥ prāṇo
vyāttamagnirvaiśvānaraḥ saṃvatsara ātmāśvasya
medhyasya | dyauḥ pṛṣṭhamantarikṣamudaraṃ pṛthivī pājasyaṃ diśaḥ
pārśve avāntaradiśaḥ parśava ṛtavo'ṅgāni māsāścārdhamāsāśca
parvāṇyahorātrāṇi pratiṣṭhā nakṣatrāṇyasthīni nabho
māṃsāni | ūvadhyaṃ sikatāḥ sindhavo gudā yakṛcca klomānaśca parvatā oṣadhayaśca
vanaspatayaśca lomānyudyanpūrvārdho nimlocañjaghanārdho yadvijṛmbhate
tadvidyotate yadvidhūnute tatstanayati yanmehati tadvarṣati vāgevāsya vāk
|| 1 ||

अहर्वा अश्वं पुरस्तान्महिमान्वजायत तस्य पूर्वे समुद्रे योनी रात्रिरेनं
पश्चान्महिमान्वजायत तस्यापरे समुद्रे योनिरेतौ वा अश्वं महिमानावभितः
सम्बभूवतुः । हयो भूत्वा देवानवहद्वाजी गन्धर्वानर्वासुरानश्वो
मनुष्यान्समुद्र एवास्य बन्धुः समुद्रो योनिः ॥ २ ॥

aharvā aśvaṃ purastānmahimānvajāyata tasya pūrve samudre yonī rātrirenaṃ
paścānmahimānvajāyata tasyāpare samudre yoniretau vā aśvaṃ mahimānāvabhitaḥ
sambabhūvatuḥ | hayo bhūtvā devānavahadvājī gandharvānarvāsurānaśvo
manuṣyānsamudra evāsya bandhuḥ samudro yoniḥ || 2 ||

इति प्रथमाध्यायस्य प्रथमं ब्राह्मणम् ॥

iti prathamādhyāyasya prathamaṃ brāhmaṇam ||